Liqenet e Jezercës janë një nga destinacionet më të bukura dhe më të fshehura të Alpeve Shqiptare. Kjo aventurë dy-ditore ju çon në zemër të veriut të Shqipërisë, ku do të eksploroni kanione spektakolare, burime të kristalta dhe liqene akullnajore mahnitëse.

Arratisje nga Tirana drejt Malësisë së Madhe

U larguam nga gjallëria e Tiranës dhe u nisëm drejt veriut të Shqipërisë, duke përshkuar rrugë të bukura malore që na çuan në zemër të Malësisë së Madhe. Ja itinerati që ne ndoqëm:

Banjo Natyrale në Selcë – Gropat e Selcës

Ndalesa jonë e parë ishte në Gropat e Selcës, një oaz me ujëra të kristalta dhe të freskëta. Në mes të natyrës së egër, ky vend ishte perfekt për t’u çlodhur dhe për të rifreskuar energjitë përpara vazhdimit të udhëtimit.

Kanioni i Bashkimit – Adrenalinë dhe Qetësi

Në zemër të Vermoshit, eksploruam Kanionin e Bashkimit, një peizazh mahnitës me shkëmbinj të lartë dhe ujëra të freskëta e të pastra. Natyrisht, nuk i rezistuam një zhytnie të shpejtë për një dozë adrenaline dhe freski të menjëhershme.

Syri i Kaltër i Vuthaj – Magjia e “Synit të Skafkacit”

Një tjetër mrekulli e fshehur që zbuluam ishte Syri i Kaltër i Vuthajve, i njohur ndryshe si “Syni i Skafkacit”. Pas një ecjeje prej 20 minutash në pyll, ky burim me ujë të akullt dhe ngjyrë të thellë blu na mahniti me qetësinë dhe bukurinë e tij natyrore.

Mikpritje e ngrohtë në Vuçetaj Guesthouse

Pas një dite aventureske, e mbyllëm me një darkë tradicionale dhe një mbrëmje të ngrohtë në Vuçetaj Guesthouse. Ky vend ishte baza ideale për të nisur udhëtimin e nesërm.

Nëse planifikoni të kaloni kufirin për në Vuthaj, sigurohuni që të keni me vete pasaportën dhe të blini sigurimin ditor në pikën kufitare për një udhëtim të sigurt dhe të rregullt.

Liqenet e Jezercës Shqipëri – Magjia Akullnajore në Alpet Shqiptare

Para agimit, morëm automjetet off-road të ofruara nga guesthouse dhe mbërritëm në Zestan, pika ku nis ecja jonë drejt Liqeneve të Jezerces.

Nga Zestani, një ecje prej rreth 1.5 orësh na çoi mes terreneve të thyer, me pamje madhështore të maleve përreth. Rruga ishte e mbushur me ajër të pastër malor dhe natyrë të paprekur.

Liqenet e Jezerces – Përqafimi i natyrës së egër

Kur mbërritëm në Liqenet e Jezerces, peizazhi ishte magjepsës. Këto liqene akullnajore, të rrethuara nga majat më të larta të Shqipërisë, ofrojnë qetësi dhe bukuri të jashtëzakonshme. Shumë prej nesh u hodhën në ujërat e tyre të ftohta për një përvojë të paharrueshme e freskuese.

Në këtë vend të largët dhe të qetë, u ndjemë të vegjël përballë madhështisë së natyrës së paprekur.

Kthimi drejt Tiranës

Pas disa orësh mes liqeneve dhe maleve, nisëm zbritjen drejt Zestanit. Më pas u kthyem në Tiranë, të mbushur me kujtime dhe emocione që do të na qëndrojnë gjatë në mendje.

Pse Liqenet e Jezercës Shqipëri janë një destinacion unik në Alpet Shqiptare

Nga Tubat e Selcës e deri te Kanioni i Bashkimit, nga magjia e Synit të Skafkacit te qetësia e Liqeneve të Jezerces, ky udhëtim është një kombinim i përsosur i aventurës dhe natyrës. Ky është destinacioni ideal për ata që kërkojnë të zbulojnë thesaret e fshehura të Alpeve Shqiptare.

Nëse dëshironi më shumë aventura alpine, mos humbisni edhe Udhëzuesin tonë për një arratisje në Parkun Kombëtar të Valbonës.